१२ कक्षा पास गर्ने आमाहरू

काभ्रे, अर्घाखाँची र सल्यान — चुलोचौकोसँगै बालबच्चा स्याहार्दा पढाइ बीचैमा छाडेका केही आमाहरूले फेरि पढाइ थालेर १२ कक्षा पास गरेका छन् । यस्तै उदाहरण हुन् बाराको कलैया घर भएकी ३२ वर्षीया अमृताकुमारी ठाकुर । उनले एसएलसी दिएको डेढ दशकपछि बनेपास्थित आदर्श विद्या मन्दिर (एबीएम) स्कुलमा भर्ना भएर २.४५ जीपीए ल्याउँदै कक्षा १२ उत्तीर्ण गरेकी छन् ।

भक्तपुरमै जन्मे, हुर्के पनि २०६४ मा एसएलसीपछि पारिवारिक बसाइँले अमृता पुर्ख्यौली घर बारा पुगेकी थिइन् । ट्युसन र स्कुल पढाएर आउने आम्दानीले घर खर्च टार्दै कक्षा १२ सम्म पुगिन् । परीक्षाको समयमै विवाह हुँदा जाँचमा दिन पाइनन् । विवाहपश्चात् रोकिएको परीक्षा दिने प्रयास गरे पनि परिवारले अनुमति दिएन । ‘किताब खोजेर पढ्न थालेकी थिएँ । मैले पढेको श्रीमान्बाहेक परिवारमा कसैलाई मन पर्दैनथ्यो,’ उनले सुनाइन्, ‘यही कारणले परिवारमा बेमेल भयो, हामीलाई घरबाट निकालियो, एक रात गोठमै बस्यौं अनि रोजगारी गर्न बनेपा आयौं ।’