गाउँमा विभेद, विदेशमा ख्याति : दलित बस्तीमा घरैपिच्छे ‘सेफ’

बाहुनडाँगी, झापा — मनिकुमार शंकर ३० को दशकको अन्त्यतिर ७ कक्षामा पढ्दै थिए, पाकशिक्षा भनेर पकाउने विधिबारे छुट्टै पाठ्यक्रम पढाइन्थ्यो । वर्षमा एक दिन वनभोजझैं विद्यार्थीले पकाएर शिक्षकलाई खुवाउने गरिन्थ्यो । त्यही बेला उनले सहपाठी र शिक्षकबाट विभेद भोग्नुपर्‍यो ।

‘मैले छोएको निहुँमा सहपाठीसँगै शिक्षकले खाइदिएनन्, सबै खेर फाल्नु परेको थियो,’ चार दशकअघिको तीतो अनुभव सुनाए, ‘त्यसै बेलादेखि दुनियाँलाई पकाएर ख्वाउने इख मनमा पलायो ।’