दल–निषेधको अमिल्दो घुर्की !

‘भदौरे चट्याङ’ पश्चात् केही कोणबाट पुराना दलहरूलाई निषेध गर्ने घुर्की सुनिएको छ ।के यो फगत ‘उरेन्ठेउलो हठ’ मात्रै हो ? सत्ता निवृत्त दलहरूप्रति हेय भाव राखिएजस्तो भाव देखिए पनि मूलतः यो बहुदलीयताप्रति प्रहार गर्ने सुविचारित यत्न हो । र, यो दलविहीनताको मौसम फर्काउने दीवास्वप्न देख्ने हठ हो । दलीय विरोध गरेर नेपाल र नेपालीको हित हुन्छ भन्ने कसैले सोच्छ भने त्यस्तो समूह पक्कै अज्ञानको स्वर्गमा रमाइरहेको हुनुपर्छ ।

तर, अहिलेको कुहिरो लाग्न थालेको परिवेशमा दलविरोधी भावना भड्काएर त्यसलाई नियन्त्रित राख्ने निहुँमा प्रशस्त मोल–मोलाइ गर्न सकिने रहेछ । नवपुस्ता वर्गलाई नियन्त्रित राख्न अनेक भाष्यका पटकथा लेखिँदै छ । बहुदलीयलाई बलि चढाएर स्वतन्त्रहरूलाई नै महानायकका रूपमा स्थापित गर्ने यत्न अहिले नै भएको होइन । निर्दलीयलाई परिष्कृत गरी विभिन्न शक्ति केन्द्रले ‘स्वतन्त्र’ उम्मेदवारीको सफल प्रयोग काठमाडौंमा पछिल्ला चुनावमै गरिसकेका छन् ।