‘श्री ५’ को बन्धनमा जनताको जमिन
annapurnapost.com · Thu Sep 02 06:11:00 GMT 2021
गोर्खा र धादिङका हजारौं रोपनी जग्गाको लालपुर्जा अझै श्री ५ को नाममा छ। तर न श्री ५ अस्तित्वमा छ, न त राजतन्त्र नै। अझै दूरदराजका नागरिकको जग्गा मात्रै होइन, पूरै गाउँ नै ‘श्री ५ को वायुगुठी’ शब्दले भोगचलनमा अड्काएको छ। नागरिकले जग्गा प्रयोग गर्न पाउँछन्, तर आफ्नो नाममा सार्न वा किन्न पाउँदैनन्। वर्षौं भयो यो क्रम चलेको। किसानलाई अन्यायपूर्ण रूपमा अल्झनमा राखिएको छ। यस्ता क्षेत्रमा बस्ने सबै नागरिक अझै सम्पत्ति र जग्गामा स्वतन्त्र हुन पाएका छैनन्। पुस्तौंदेखि किसानले कमाएको जग्गाजमिन तथा घरघडेरीको लालपूर्जामा जग्गाधनी ‘श्री ५ को वायुगुठी’ अंकित छ। जग्गाधनी वायुगुठी छ, कर नागरिक तिर्छन्।
गोरखाको आरुघाट गाउँपालिका ३ र ४ साथै धादिङको नेत्रावती गाउँपालिका र नीलकण्ठ नगरपालिकाका कटुञ्जे र ज्यामरुङका जग्गाजमिनको स्वामित्व ‘श्री ५ को वायुगुठी’ छ। गोरखाको पुरानो थुमी गाविसका ७ सय ४९ जना किसानले आवादी गरेका खेतबारी र घरघडेरी वायुगुठीको नाममा छ। ७३ जना किसानको मात्र यस क्षेत्रमा आफ्नो नाममा लालपूर्जा छ। आर्खेत बजार र ढुंगेफाँटका दुई बस्ती अझै पनि ज्यामरुङ दरबारका राजा लीलाविक्रम शाहको नाममा छ। धेरै पुस्ताले भोगचलन गर्दै आए पनि आफ्नो नाममा जग्गा जमिन नहुँदा यस क्षेत्रका नागरिकले मुलुकभित्रै अझै पनि कसैको शरणमा बस्नु परेको महसुस गरिरहेका छन्। आफ्नै लालपूर्जा नहुँदा मोही बनेर बस्नु परेको छ।
स्रोतमा पूरा पढ्नुहोस् (annapurnapost.com)