कालोपत्र गर्न ९ वर्षअघि ठेक्का, सडक निर्माण अझै अलपत्र

रुकुम पूर्व — मध्यपहाडी लोकमार्गअन्तर्गत बागलुङको सिमाना जोडिएको खण्डमा कालोपत्र गर्न भनेर ठेक्का लागेको ९ वर्ष बितिसक्दा पनि निर्माण कार्य सम्पन्न हुन सकेको छैन । भूमे गाउँपालिका–१ स्थित रूपगादेखि पाथीहाल्नेसम्मको कुल १३ किलोमिटर सडक आधाउधी काम गरेर अललपत्र छोडिएको हो ।

मध्यपहाडी लोकमार्ग आयोजना कार्यालय दैलेखका अनुसार २०७३ जेठमा कालोपत्र र केही ठाउँमा ढलानसमेत गर्ने गरी कुल ४२ करोडमा भारत–महादेव खिम्ती–सिद्धिशाही जेभीले कामको जिम्मा पाएको थियो । तीन वर्षपछि अर्थात् २०७६ जेठमा काम सक्ने गरी गरिएको सम्झौता अनुसारको काम थप ६ वर्ष बितिसक्दा पनि सकिने त परेको कुरा काम नै अस्तव्यस्त बनाएर छोडिएको छ ।