अधिकांश ग्यास्ट्रिक पूर्ण रूपमा निको पार्न सकिन्छ (भिडिओ)

ग्यास्ट्रिक भन्नाले माथिल्लो पेट दुख्ने, पोल्ने अथवा खाना खाएपछि पेट फुलेजस्तो हुनुलाई बुझिन्छ। कतिपयलाई ढ्याउ धेरै हुने समेत हुन्छ। नेपालमा धेरै हेलिकोब्याक्टर पाइलोरी भन्ने किटाणुले ग्यास्ट्रिक भएको देखिन्छ। कहिलेकाहीँ नदुख्ने औषधी खाँदाखेरी ग्यास्ट्रिक हुन्छ। ग्यास्ट्रिकका बिरामीले मुटु दुख्यो समेत भनेका हुन्छन्।

केले गर्दा ग्यास्ट्रिक हुन्छ भन्ने थाहा भयो भने चाँडै उपचार गर्न सकिन्छ। समयमा खाना नखाँदा पेट दुख्ने र ग्यास्ट्रिक हुने हुन्छ। पिरो, चिल्लो र सुख्खा खाना खान हुँदैन। कुनै पनि औषधी चिकित्सकको सल्लाहबिना खान हुँदैन। एसिडिटी बढाउने खाना, चुरोट, रक्सी अनि सुर्ती खान हुँदैन। हेलिकोब्याक्टर पाइलोरी भन्ने किटाणु खानपिनबाट सर्ने भएकाले सरसफाइमा ध्यान दिन खानुभन्दा पहिला साबुन पानीले हात धुने, शौचालय गइसकेपछि साबुन पानीले अनिवार्य हात धुने गर्नुपर्छ। त्यस्तै, अर्काको जुठो नखाने हो भने जोगिन सकिन्छ। अत्यधिक पिरो र चिल्लो खाना खान हुँदैन।