सेयर बजारमा कारोबार सुक्खा, दुई वर्षयताकै न्यून कारोबार

काठमाडौं- नेपाली सेयर बजारमा कारोबार रकम लगातार खुम्चिँदै गएको देखिएको छ । सोमवार नेप्सेमा जम्मा २ अर्ब ४५ करोड रुपैयाँ बराबरको कारोबार भएको छ, जुन पछिल्लो दुई वर्षयताकै न्यून कारोबार रकम हो । यसअघि २०८१ वैशाख २४ मा यति कम कारोबार भएको थियो ।

यद्यपि फागुन २५ गते ५५ करोड रुपैयाँ मात्र कारोबार भएको रेकर्ड भए पनि त्यो दिन सर्किट ब्रेकरका कारण बजार पूरा समय सञ्चालन हुन सकेको थिएन। सामान्य चार घण्टे कारोबार अवधिमा भने सोमवारको कारोबार सबैभन्दा कमजोर मानिएको छ ।

यस दिन नेप्से परिसूचक सामान्य १.०३ अंकले घटेर २७३० विन्दुमा रोकिएको छ। बजारमा ११९ कम्पनीको सेयर मूल्य बढ्दा १३२ कम्पनीको घटेको देखियो भने १८ कम्पनीको मूल्य स्थिर रह्यो।

समूहगत रूपमा बैंकिङ, विकास बैंक, हाइड्रोपावर, लगानी र अन्य उपसमूहमा सामान्य वृद्धि देखिएको छ। तर फाइनान्स, होटल तथा पर्यटन, बीमा, उत्पादनमूलक उद्योग, माइक्रोफाइनान्स र व्यापार समूहमा गिरावट आएको छ।

आज इङवा हाइड्रोपावरको सेयर मूल्य सबैभन्दा धेरै ८.४२ प्रतिशतले बढेको छ । बुंगल हाइड्रोपावर र सगरमाथा जलविद्युत् कम्पनीको सेयरमा पनि उल्लेख्य वृद्धि देखियो । यता एसवाई प्यानलको मूल्य भने ३.६० प्रतिशतले घटेको छ । कारोबार रकमका आधारमा साहस ऊर्जा, रिलायन्स स्पिनिङ मिल्स, एसवाई प्यानल, अपि पावर र शिवम् सिमेन्ट सबैभन्दा धेरै कारोबार हुने कम्पनीमा परेका छन् ।