अर्थमन्त्रीमाथि संसदीय छानबिन गर्न विपक्षी दलको माग, परराष्ट्रमन्त्रीको जवाफमा असन्तुष्टि

विपक्षी दलहरूले बजेटको बेला अस्वाभाविक ढंगले विद्युतीय गाडी (ईभी) भित्रिएको तथा आर्थिक विधेयकमा हेराफेरि गरिएकोबारे संसदीय छानबिनको माग गरेका छन् ।

बिहीबार बसेको प्रतिनिधिसभा बैठकमा नेकपा एमाले, नेकपा र राप्रपाले संसदीय छानबिन माग गरेका हुन् । एमालेका ऐन महर, नेकपाका युवराज दुलाल र राप्रपाका ज्ञानेन्द्र शाहीले संसदीय छानबिनको माग गरेका हुन् ।

‘अस्वाभाविक ढंगले ईभी आयात भएका छन् र सामान नआउँदै भन्सार पास गरिएको छ, यो शंकास्पद भयो’, दुलालले भने, ‘अर्थ विधेयकमा पनि हेरफेर भएको छ । संसदीय छानबिन हुनुपर्छ ।’

विपक्षी दलले प्रधानमन्त्री बालेनको अभिव्यक्तिबारे परराष्ट्रमन्त्रीले दिएको जवाफ चित्तबुझ्दो नभएको भन्दै प्रधानमन्त्री स्वयले संसद्‌मा जवाफ दिनुपर्ने पनि माग गरे ।

कांग्रेसकी सीता थपलिया, एमालेका ऐन महर, श्रम संस्कृति पार्टीका हर्क साम्पाङ लगायतले नेपालले समेत भारतीय भूमि मिचेको भन्ने प्रधानमन्त्रीको अभिव्यक्ति संसद्‌को रेकर्डबाट हटाउन माग गरे ।

विपक्षी दलले प्रधानमन्त्रीको अभिव्यक्तिलाई लिएर संसद्‌मा विरोध जारी राख्ने बताएका छन् । विपक्षी दलले विरोध दर्ज गरेपछि संसद्‌मा बजेटमाथिको सैद्धान्तिक छलफल शुरू भएको छ ।