समानुपातिक मतगणना १ करोड नाघ्यो: कुन दलको कति मत ?

काठमाडौँ । प्रतिनिधि सभा निर्वाचनको समानुपातिक निर्वाचन प्रणालीतर्फको मतगणना १ करोड नाघेको छ । निर्वाचन आयोगले सार्वजनिक गरेको पछिल्लो एकीकृत विवरण अनुसार देशभर हालसम्म १ करोड १० हजार ४२० मत गणना भइसकेको छ । जसमा राष्ट्रिय स्वतन्त्र पार्टीले आफ्नो वर्चस्व कायम राख्दै ४८ लाख १४ हजार ५ सय ४२ मतका साथ अग्रता लिइरहेको छ ।

पछिल्लो नतिजा अनुसार दोस्रो स्थानमा रहेको नेपाली कांग्रेसले १६ लाख २० हजार ५ सय ५९ मत प्राप्त गरेको छ भने नेकपा (एमाले) १३ लाख ४९ हजार ४ सय ५० मतका साथ तेस्रो स्थानमा रहेको छ । त्यसैगरी, नेपाली कम्युनिस्ट पार्टीले ७ लाख ३३ हजार ६ सय १० मत प्राप्त गर्दै आफूलाई चौथो स्थानमा सुरक्षित राखेको छ ।