९ महिनादेखि साढे २९ सय सवारी भन्सारमै

काठमाडौँ — बैंकहरूले ऋण प्रवाह गर्न छाडेका कारण ९ महिनायता साढे २९ सय सवारीसधान विभिन्न भन्सार नाकामा अड्किएर बसेका छन् । व्यवसायीले सोरुममा भएका सवारी बिक्री भएपछि मात्र भन्सारमा रोकिएका सवारी छुटाउने गरेका छन् । जसले गर्दा भन्सारमा धेरै संख्यामा सवारी रोकिएका हुन् ।

नेपालमा धेरै सवारी भित्रिने भन्सार नाकामा वीरगन्ज र भैरहवा पर्छन् । जसअनुसार भैरहवा नाकामा मात्रै पिकअप गाडी, जिप, स्कुल बस, कार र भ्यानसहित १ हजार ७७ थान साधन थन्किएका भैरहवा भन्सार कार्यालय प्रमुख मनिराम पौडेलले बताए । ‘नयाँ सवारीसाधन भन्सारमा भित्रिरहन्छन् । अहिले पनि धेरै गाडी आएर बसेका छन्, जसमध्ये पिकअप गाडी धेरै संख्यामा छन्,’ उनले भने, ‘गाडी ल्याउने व्यवसायीसँग बुझ्दा बैंकले ऋण सुविधा नदिएकाले भन्सारमै थन्क्याएर राख्नुपरेको बताउने गरेका छन् ।’