अर्थमन्त्री वाग्लेले संसदीय समितिमा समेत झुटो बोलेको आरोप

काठमाडौँ . राष्ट्रिय प्रजातन्त्र पार्टी (राप्रपा) संसदीय दलका नेता एवं सांसद ज्ञानबहादुर (ज्ञानेन्द्र) शाहीले भन्सारमा भएको विद्युतीय सवारी साधन (ईभी) को करछली प्रकरणबारे तत्काल संसदीय छानविन समिति गठन गर्न सरकारसँग माग गरेका छन्। बिहीबार बसेको प्रतिनिधि सभा बैठकमा आकस्मिक समय लिएर बोल्दै उनले ईभी गाडीहरूको भन्सार जाँचपास र करका दर हेरफेरमा स्वयम् अर्थमन्त्री डा. स्वर्णिम वाग्लेको संलग्नता रहेको जिकीर गर्दै उच्चस्तरीय छानविनको दबाब दिएका हुन्।

नेता शाहीले यस प्रकरणलाई लिएर अर्थमन्त्री वाग्लेले संसदीय समितिमा समेत झुटो बोलेको गम्भीर आरोप लगाए। बजेट र आर्थिक विधेयक सार्वजनिक गरेलगत्तै करका दरहरू चलाएको र सूचना चुहाएको आरोप खेपिरहेका अर्थमन्त्रीले बुधबार मात्रै सार्वजनिक लेखा समितिमा आफूले कुनै बदमासी नगरेको दाबी गरेका थिए। तर, सांसद शाहीले गाडीहरू भन्सारमा भौतिक रूपमा नभित्रिँदै त्यसको जाँचपास कसरी गरियो भन्दै सरकारमाथि प्रश्न उठाएका छन्।