भएको सम्पत्ति देखाउन किन कन्जुस्याइँ ?

प्रधानमन्त्री पुष्पकमल दाहाल ‘प्रचण्ड’ले ७० दिनमा दोस्रोपटक विश्वासको मत पाए । विश्वासको मत पाएपछि उनले अब आफ्ना एजेन्डाअनुरूप सहजै काम गर्ने वातावरण बनेको छ । मुलुकका हितमा हुने कुनै पनि काम गर्नका लागि अब उनलाई कतैबाट कुनै किसिमको रोकावट आउनेछैन । तेस्रोपटक प्रधानमन्त्री बन्नुअघि नै ‘मुलुकको नेतृत्व गर्ने अवसर पाएँ भने राम्रो गर्छु’ भनेर सार्वजनिक रूपमा अभिव्यक्ति दिएका प्रधानमन्त्री दाहालले प्रधानमन्त्रीको कुर्सी सम्हालेको ७० दिन पूरा हुँदा पनि सम्पत्ति विवरण भने सार्वजनिक गरेका छैनन् । प्रधानमन्त्री मात्रै होइन बहालवाला अन्य ६ जना मन्त्रीको समेत सम्पत्ति गोप्य राखिएको छ ।

सामान्यतय प्रधानमन्त्री तथा मन्त्रिपरिषद् कार्यालयको वेबसाइटमार्फत सम्पत्ति सार्वजनिक गर्ने प्रचलन छ । अहिले सो साइटमा सम्पत्ति प्राप्त भएको मात्रै उल्लेख छ । कसको कति भनेर उल्लेख गरिएको छैन ।