कर्णालीमा प्रतिपक्षसँगको सहमति कार्यान्वयन गर्न सरकार तयार भए पनि खाका अझै बनेन

सुर्खेत । चालु आर्थिक वर्षको आधा अवधि गुज्रिसक्दा पनि कर्णाली प्रदेश सरकार रातो किताबमा भएका योजना परिमार्जन गर्न सकिरहेको छैन । प्रमुख प्रतिपक्ष दल नेकपा एमालेले आफूसँग भएको सहमति अनुसार योजना संशोधनमा ढिला गरिरहेको आरोप लगाउँदै सरकारमाथि दबाब बढाइरहेको छ । अर्कोतिर आर्थिक वर्षको आधा अवधि गुज्रिसकेका कारण पनि बजेट खर्च गर्न सरकारमाथि दबाब बढ्दो छ ।

कर्णाली सरकारको रातो किताबमा आएका १५ लाख मुनिका साढे पाँच सय योजना प्रमुख प्रतिपक्ष दल एमालेसँग गरिएको सहमति अनुसार बजेट थप गरेर कार्यान्वयन गर्ने निर्णय प्रदेशको मन्त्रिपरिषद् बैठकले गरिसकेको छ । पुस २९ गते बसेको मन्त्रिपरिषद् बैठकले सदनमा सहमति भएका टुक्रे योजनाहरू १५ लाख पुर्‍याएर कार्यान्वयन गर्ने निर्णय गरेको हो । तर सम्बन्धित योजनाका बारेमा विषयगत मन्त्रालयहरूले अझै कार्यान्वयनको खाका तयार पार्न सकेका छैनन् ।