जय ट्रफीको फाइनल चैत ३ गतेदेखि, चैत ७ देखि प्रधानमन्त्री कप सुरु हुँदै

काठमाडौँ । नेपाल क्रिकेट संघ (क्यान) को आयोजनामा सञ्चालित दुईदिवसीय जय ट्रफी इलाइट कप क्रिकेट प्रतियोगिताको फाइनल समीकरण पूरा भएको छ। काठमाडौँमा जारी प्रतियोगिताको समूह चरणबाट नेपाल प्रहरी क्लब र त्रिभुवन आर्मी क्लब फाइनलमा प्रवेश गरेका हुन्।

उपाधि भिडन्तका लागि यी दुई विभागीय टोलीबिच आगामी चैत ३ गतेदेखि ५ गतेसम्म काठमाडौँको माथिल्लो मुलपानी क्रिकेट मैदानमा तीनदिवसीय ढाँचामा प्रतिस्पर्धा हुनेछ। फागुन ८ गतेदेखि सुरु भएको यस प्रतियोगिताले नेपालमा लामो संरचनाको क्रिकेटलाई पुनः चलायमान बनाएको छ।

यसैबिच, नेपाली क्रिकेटको प्रतिष्ठित घरेलु प्रतियोगिता प्रधानमन्त्री कप पुरुष एकदिवसीय राष्ट्रिय क्रिकेट को मिति र स्थान पनि तय भएको छ। राष्ट्रिय खेलकुद परिषद्को वार्षिक कार्यक्रम अनुसार यस वर्षको प्रधानमन्त्री कप चैत ७ गतेदेखि २०८३ साल वैशाख ४ गतेसम्म सञ्चालन हुने भएको छ। यो प्रतियोगिता मधेस प्रदेशका दुई सहर पर्सा र जनकपुरमा मुख्य रूपमा आयोजना गरिनेछ।

प्रतियोगितालाई थप प्रभावकारी बनाउन केही खेलहरू भने काठमाडौँस्थित त्रिभुवन विश्वविद्यालय क्रिकेट मैदान र माथिल्लो मुलपानी क्रिकेट मैदानमा पनि खेलाइने क्यानका प्रवक्ता छुम्बी लामाले जानकारी दिए। देशभरका उत्कृष्ट प्रतिभाहरू सहभागी हुने यस प्रतियोगितालाई नेपाली क्रिकेटको जग मानिन्छ।