दमक भ्युटावरबाट देखिएको दृश्य

प्रधानमन्त्री केपी शर्मा ओलीले अर्बौंको लागतमा आफ्नो निर्वाचन क्षेत्रका मतादाता खुसी बनाउन दमकमा निर्माण गरेको भ्युटावर प्रारम्भदेखि नै चर्चित बन्दै आएको हो । निर्माण सम्पन्न भएको भ्युटाबर कस्तो छ, त्यहाँबाट कस्तो दृश्य देखिन्छ ? भन्ने कौतूहल सबैलाई लाग्न सक्छ । अन्यत्रको भ्युटावरभन्दा दमक भ्युटावरको विशेषता भिन्न छ किनकि यो त प्रधानमन्त्रीकै इच्छामा बनाइएको हो । यसैले पूर्व गएको बेला सो भ्युटावरबाट दृश्यावलोकन गर्ने स्तम्भकारको चाहना थियो । केही दिनपहिले विशेष कामको सिलसिलामा काठमाडौंबाट विराटनगर हुँदै झापातर्फ म प्रस्थान गर्दै थिएँ । विराटनगरबाट करिब एक घन्टामा मोरङ जिल्लाकै पथरी बजार के पुगेको थिएँ २–४ जना परिचित व्यक्तिले मलाई देखी गाडी रोके । उनीहरूसँगको केहीबेरको भलाकुसारीपछि म दमकतर्फ अगाडि बढ्न लाग्दा नै एक मित्रको अहिले त जंगल सकिएपछि, पथरीबाटै टाढाको दृश्य पनि देखिन्छ । ऊ त्यो पूर्व उत्तरतर्फ हेर्नुहोस् त दमकको ओली टावर यहीँबाट छर्लङ्ग देखिन्छ भनी औंल्याए ।

दमक भ्युटावरलाई ओली टावरको नामले सम्बोधन गरेको पाउँदा मलाई आश्चर्य पनि लाग्यो । झलक्क टावरतिर आँखा लगाई बिदा मागेर म दमकतर्फ प्रस्थान गरेँ । भ्युटावरको बनावट हेर्ने र दृश्यावलोकन गर्ने अवसर यही भएको ठानी अगाडि बढेँ । लामो समयपछिको दमक उपस्थिति भए पनि दमकको भौगोलिक अवस्था, बसोबास र सामाजिक वातावरण मेरा लागि नौलो थिएन । दमकको मूलचोकबाट उत्तर बजारलाइनतर्फ गाडी मोडनासाथ २–४ जना परिचित व्यक्तिले मलाई रोके । उनीहरूसँगको केहीबेरको छोटो संवादपछि छुट्टिन लाग्दा भ्युटावर देखाउन हामी पनि जान्छौं भनी २–३ जना गाडीमा बसेपछि हामी केहीबेरमै भ्युटावर पुग्यौं । मैले सुनेको दमक भ्युटावरको नाम पनि दमकवासीले आआफ्नै तरिकाले राखेको उनीहरूबाटै थाहा पाएँ । कतिपयले भ्युटावरलाई पथरीकै जस्तो ओली टावरै भने, कसैले नवसम्भ्रान्तको टावर भने, कसैले कम्युनिस्ट टावर भने, कसैले नक्सलाइट टावर त कसैले झापा हत्याकाण्डको दृश्यावलोकन गर्ने टावर भनेको सुन्दा मलाई आश्चर्य लाग्यो ।