मिडिया काउन्सिल विधेयकबारे बुझ्न मन्त्रीलाई बोलाउने समितिको निर्णय

काठमाडौँ — मिडिया काउन्सिल विधेयकका प्रावधान नियन्त्रणमूखी नभई नियमनकारी हुने गरी राष्ट्रिय सभाको विधायन व्यवस्थापन समितिले साझा धारणा बनाएको छ । मंगलबारदेखि दफावार छलफलमा जाने उक्त विधेयकका प्रावधानले सञ्चारमाध्यमको पूर्ण स्वतन्त्रताको प्रत्याभूति गर्नुपर्ने, काउन्सिलका अध्यक्षको सिफारिससम्बन्धी व्यवस्थामा सुधार गर्ने, उमेर हदका विषयमा पुनर्विचार गर्नेलगायत साझा धारणा बनेको समितिले जनाएको छ ।

सोमबारको बैठकपछि प्रतिक्रिया दिँदै समितिकी सभापति जयन्तीदेवी राईले आगामी बैठकमा मिडिया काउन्सिल विधेयकका विषयमा सरकारको आधिकारिक धारणा बुझ्ने प्रयोजनका लागि सञ्चार तथा सूचना प्रविधिमन्त्री पृथ्वी सुब्बा गुरुङलाई आमन्त्रण गर्ने निर्णय भएको बताइन् । यसअघि सांसद, विज्ञ र सरोकारवालासँग छलफलका क्रममा उठेका विषयहरूमा समितिले सरकारको प्रतिक्रिया बुझ्ने तयारी गरेको उनले जनाइन् ।