बजेटमाथि रास्वपा सांसद अमरेश सिंहको प्रहार, ‘डरले शासन चल्ला, विकास हुँदैन’ 

काठमाडौँ- सत्तारुढ दलका सांसद डा. अमरेशकुमार सिंहले आगामी आर्थिक वर्षको बजेटले आमनागरिक, किसान तथा शिक्षा-स्वास्थ्य क्षेत्रका सरोकारलाई सम्बोधन गर्न नसकेको टिप्पणी गरेका छन्। प्रतिनिधिसभामा बजेटमाथिको छलफलमा बिहीबार भाग लिँदै उनले देशमा ‘डरको माहोल’ सिर्जना भएको दाबी गर्दै यस्तो वातावरणमा आर्थिक गतिविधि र विकास दुवै प्रभावित हुने बताए।

‘डरले शासन चल्ला, तर विकास हुँदैन,’ उनले भने, ‘आज व्यापार गर्ने वातावरण छैन। बैंकमा निक्षेप थुप्रिएको छ, तर ऋण लिन कोही तयार छैन।’ उनको प्रश्न छ- ‘बजेटबाट नेपालको कति प्रतिशत जनशक्ति खुसी भयो? बैंकर खुसी भए भनिन्छ, तर बैंकमा त्यत्रो निक्षेप किन जम्मा भइरहेको छ त्यता ध्यान दिन पर्दैन र?’ कसैले ऋण लिने अवस्था छैन र आजको दिनमा यहाँ व्यापार गर्ने वातावरण नै छैन भन्दै उनले आफ्नै अर्थमन्त्रीप्रति कटाक्ष गरे।