ओमानबाट इरान जाँदै गरेको जहाजमा अमेरिकी सेनाको प्रहार

तेहरान । ओमानबाट इरानतर्फ जाँदै गरेको एउटा कार्गो जहाजमाथि अमेरिकी मिसाइल/प्रोजेक्टाइल प्रहार भएको दाबी इरानी सरकारी सञ्चारमाध्यमले गरेको छ । इरानको सरकारी टेलिभिजन आईआरआईबीका अनुसार उक्त जहाज ओमानको खासाब शहरबाट इरानको सिरिकतर्फ आवश्यक वस्तु बोकेर जाँदै थियो ।

जहाज खासाबबाट करिब ५ नटिकल माइल टाढा हुँदा शत्रुको मिसाइल लागेर क्षति पुगेको सिरिकका गभर्नर रेजा शाहिदियनलाई उद्धृत गर्दै आईआरआईबीले जनाएको छ । जहाज १५० टन क्षमता भएको र त्यसमा ५ जना चालक दल रहेका बताइएको छ ।

रिपोर्टअनुसार जहाजमा रहेका सबै चालक दल सदस्यलाई नजिकैबाट गुज्रिरहेका अन्य जहाजहरूको सहयोगमा उद्धार गरिएको छ र उनीहरूलाई ओमानतर्फ सारिएको छ ।

आईआरआईबी र अन्य इरानी सञ्चारमाध्यमहरूले सार्वजनिक गरेका तस्बिरहरूमा जहाज आंशिक रूपमा समुद्रमा डुबेको देखिएको छ । यो घटना अमेरिका र इरानबिच जारी सैन्य तनावको दोस्रो रात भएको बताइएको छ ।

यसअघि अमेरिकी सेनाले इरानभित्र रहेका निगरानी, सञ्चार र हवाई रक्षा प्रणालीलाई लक्षित गर्दै आक्रमण गरेको जनाएको थियो । कुनै सम्झौता नभए थप आक्रमण हुनसक्ने चेतावनी अमेरिकी राष्ट्रपति डोनाल्ड ट्रम्पले दिएका छन् ।