दैलेख बजार अब ‘फ्री वाइफाइ जोन’

दैलेख सदरमुकाममा आउने सर्वसाधारण, विद्यार्थी, सेवाग्राही तथा स्थानीय बासिन्दाका लागि अब इन्टरनेट पहुँच थप सहज बनेको छ। नारायण नगरपालिका–१ ले सूचना तथा सञ्चार प्रविधिलाई नागरिकको दैनिक जीवनसँग जोड्ने उद्देश्यसहित सदरमुकामका विभिन्न सार्वजनिक स्थानमा निःशुल्क इन्टरनेट सेवा सञ्चालनमा ल्याएको हो।

गत सातादेखि विभिन्न चोकहरूमा औपचारिक रूपमा सुरु गरिएको यो सेवा वडा कार्यालयको लगानीमा सञ्चालनमा आएसँगै स्थानीयवासी लाभान्वित भएका छन्। दैलेख सदरमुकामस्थित वडा नम्बर १ कार्यालयको करिब १ लाख ३० हजार रुपैयाँ लागतमा जडान गरिएको निःशुल्क इन्टरनेट सेवा बढी आवतजावत हुने चार स्थान—देवकोटा चोक, लोकतान्त्रिक चोक (पुरानो बजार), गणेश चोक तथा भगवती टोल (पुरानो बजार) मा उपलब्ध गराइएको छ।