कर फेरबदलमा अर्थसचिवको स्पष्टीकरण, ‘जेठ १४ को राति १२ बजेपछि मात्रै अर्थमन्त्रीले दरका विकल्पहरू पाउनुहुन्छ’

काठमाडौँ । अर्थसचिव घनश्याम उपाध्यायले बजेट निर्माणको अन्तिम समयमा हुने करका दर हेरफेर प्रक्रियाबारे सांसदहरूलाई विस्तृत स्पष्टीकरण दिएका छन् । प्रतिनिधि सभा अन्तर्गतको सार्वजनिक लेखा समितिको बैठकमा बोल्दै उनले जेठ १४ गते राति हुने कामकारबाही बजेट निर्माणको नियमित र संस्थागत प्रक्रियाकै हिस्सा भएको भन्दै त्यसमा कुनै पनि किसिमको चलखेल नहुने दाबी गरे ।

बजेट निर्माणको गोपनीयता र संवेदनशीलताका कारण अन्तिम समयमा मात्रै दरहरू तय गरिने प्राविधिक बाध्यता रहेको उनले प्रष्ट पारे । अर्थसचिव उपाध्यायका अनुसार स्थापित बजेट प्रक्रिया अन्तर्गत नै अर्थमन्त्रीले जेठ १४ गते राति १२ बजेपछि मात्रै विभिन्न विकल्पहरू प्रशासन र प्राविधिक टोलीबाट प्राप्त गर्ने गर्छन् ।