घातक डेंगु संकट अब मनसुनमा मात्र सीमित रहेन

गुरुग्राम, भारत । मे महिनामा नितिन शर्मालाई उच्च ज्वरो आएपछि सुरुमा त उनलाई यो डेंगी हो भन्ने लाग्दै लागेन । मनसुन भित्रिन अझै केही हप्ता बाँकी थियो । अधिकांश भारतीयमा झैँ नयाँ दिल्लीबाहिरको व्यावसायिक केन्द्र गुरुग्रामका ३२ वर्षीय सफ्टवेयर इन्जिनियर शर्मामा पनि डेंगी वर्षासँगै आउने र मनसुन सकिएपछि हराउने रोग हो भन्ने थियो ।

त्यसैले जब टाउको दुखाइ, शरीरका मांसपेशीमा तीव्र पीडा र थकानले उनलाई गुरुग्रामको एक निजी अस्पताल जान बाध्य बनायो, उनले आफू सामान्य भाइरल सङ्क्रमणबाट पीडित भएको ठाने । ‘मैले यसलाई कुनै मौसमी ज्वरो होला भन्ने सोचेको थिएँ,’ शर्माले भने । ‘मेरो परिवारका कसैले पनि डेंगीबारे सोचेनन्, किनभने त्यो बेला मनसुन सुरु भएकै थिएन ।’