ह्वाइट हाउस छाडेपछि कसरी बित्लान् डोनाल्ड ट्रम्पका दिन ?

एजेन्सी । अर्को महिना अमेरिकी राष्ट्रपति डोनाल्ड ट्रम्पले ह्वाइट हाउस छोड्नेछन् । उनी राष्ट्रपति पद छाडेर अमेरिकाका आम नागरिक सरह हुनेछन् । त्यसपछि उनको भविष्य के हुन्छ ? त्यसपछि उनले के गर्लान् ? सबैको चासोको विषय छ । विशेषगरी राष्ट्रपति हुनुअघि नै व्यपारीको परिचय बनाएका ट्रम्पसँग धन दौलतको कमी छैन र थिएन । उनीसँग चुनावी फन्डका रुपमा आएको १८२५ करोड रुपैयाँ पनि छ । यद्यपि, यसबाट ४ सय करोड रुपैयाँ राजनीतिक कार्य समितिमा जानेछ । तैपनि ट्रम्पसँग खर्च गर्न निकै धेरै पैसा बाँकी रहन्छ ।

उनका छिमेकीहरु भने जबसम्म ट्रम्पले ह्वाइट हाउस छाड्दैनन्, तबसम्म उनले उक्त फन्ड नचलाउने बताउँछन् । त्यसपछि भने उनले खर्च गर्नेछन् । ट्रम्पले उक्त फण्डमा जम्मा भएको पैसा पार्टीको विद्रोही गुटलाई उक्साउन, पार्टीभित्र वफादार भएर काम गर्नेहरुलाई इनाम दिन, उनीहरुलाई भ्रमण खर्च दिन, भाडामा स्टाफ लिन र कानूनी बिल तिर्न प्रयोग गर्ने सक्ने अनुमान गरिएको छ । त्यतिमात्रै होइन ट्रम्पले उक्त पैसा सन् २०२४ को चुनावका लागि जग्गा कारोबारमा समेत लगानी गर्न सक्छन् । ट्रम्पका सहयोगी जोन म्याक लफ्लि भन्छन् कि ट्रम्प रिपव्लिकन पार्टीका नेता भएकोले ४ वर्षमा निकै धेरै फण्ड उठाएका छन् ।