जेनजी अनलोनका अगुवा गुरुङको प्रश्न: विधिको शासन लागू नहुने भने पुरानो शासन र अहिलेकोमा के फरक भयो ?

जेनजी अनलोनका अगुवा तथा हामी नेपालका संस्थापक अभियन्ता सुदन गुरुङले मुलुकमा विधिको शासन कमजोर हुँदै गएको आकलन गर्दै सरकार तथा गृहमन्त्रीको कार्यशैलीमाथि असन्तुष्टि व्यक्त गरेका छन्। मंगलबार सामाजिक सञ्जालमा एक पोस्ट लेख्दै उनले वर्तमान सरकारप्रति असन्तुष्टि प्रकट गरेका हुन् ।

उनले अहिले देशमा भइरहेका गतिविधिले पुरानो शासन र अहिलेकोबिच अन्तर नरहेको टिप्पणी गरेका हुन्। गुरुङले हालका विवादित अभिव्यक्तिहरू, हिंसात्मक धम्की र समाजलाई उक्साउने भाषण खुलेआम गरिरहँदा सरकार ‘दर्शक’ बनेको आरोप लगाएका छन्। उनले लेखेका छन्, ‘दुर्गा प्रसाईँभन्दा धेरै भड्काउने, काटमारको अभिव्यक्ति दिनेहरू खुलेआम सरकारलाई चुनौती दिँदै हिँडिरहेका छन्। शान्तिपूर्ण विरोध गर्ने युवाहरूको टाउकोमा ताकेर गोली हान्नेहरू पनि तिनै हुन्।’