फिफा विश्वकप पाइरेसीमाथि कडा प्रहार : यी ३५ वेबसाइट र एप बन्द

काठमाडौं । नेपाल दूरसञ्चार प्राधिकरणले फिफा विश्वकप २०२६ का खेलहरू अनधिकृत रूपमा प्रसारण गर्ने तयारीमा रहेका ३५ वटा वेबसाइट र मोबाइल एपमाथि रोक लगाउन देशभरका इन्टरनेट तथा मोबाइल सेवा प्रदायकहरूलाई निर्देशन दिएको छ ।

प्राधिकरणले बिहीबार सेवा प्रदायकहरूलाई पत्राचार गर्दै ती वेबसाइट तथा एपमार्फत विश्वकपका खेलहरू अवैध रूपमा स्ट्रिमिङ हुन नदिने व्यवस्था मिलाउन आग्रह गरेको हो । यस सम्बन्धमा सूचना तथा सञ्चार मन्त्रालयले समेत प्राधिकरणलाई आवश्यक कारबाहीका लागि पत्राचार गरेको थियो ।

मन्त्रालयका अनुसार नेपालभित्र फिफा विश्वकप २०२६ को विशेष तथा आधिकारिक प्रसारण अधिकार हिमालय टेलिभिजन नेटवर्क अन्तर्गतको हिमालय स्पोर्ट्स र डिसहोम डिजिटल प्रालिअन्तर्गतको डिगो–जेभीएचटिभीले प्राप्त गरेका छन् ।

यद्यपि केही पाइरेटेड वेबसाइट र एपहरूले प्रतियोगिताका खेलहरू नेपालभित्र नि:शुल्क तथा अनधिकृत रूपमा स्ट्रिमिङ गर्ने तयारी गरिरहेको सूचना प्राप्त भएपछि नियामक निकायले सेवा प्रदायकहरूलाई ती प्लेटफर्ममा पहुँच रोक्न निर्देशन दिएको हो ।

चार वर्षअघि सम्पन्न फिफा विश्वकपका क्रममा पनि यस्ता अनधिकृत स्ट्रिमिङ प्लेटफर्मका कारण इन्टरनेट ब्यान्डविथको खपत अस्वाभाविक रूपमा बढेको थियो । त्यसबेला सेवा प्रदायकहरूले अतिरिक्त अन्तर्राष्ट्रिय ब्यान्डविथ शुल्क व्यहोर्नुपरेको थियो ।

साथै, करोडौं रुपैयाँ खर्चेर प्रसारण अधिकार खरिद गरेका आधिकारिक प्रसारकहरूले पनि पाइरेसी नियन्त्रणका लागि सरकारसँग बारम्बार आग्रह गर्दै आएका थिए ।

यसैबीच मन्त्रालय, सेवा प्रदायक तथा प्रसारण अधिकार प्राप्त कम्पनीहरूबीच भएको छलफलपछि प्राधिकरणले अनधिकृत प्लेटफर्ममाथि कारबाही प्रक्रिया अघि बढाएको हो ।

निर्देशन जारी भएसँगै केही वेबसाइटहरूमा पहुँच रोक्ने काम सुरु भइसकेको जनाइएको छ । प्राधिकरणले प्रतिबन्ध लगाउन निर्देशन दिएका ३५ वेबसाइट तथा एपहरूको सूची समेत सार्वजनिक गरेको छ ।