गेटबाटै बचतकर्तालाई रित्तोहात फर्काउँदै श्री लालीगुराँस सहकारी

राजधानी समाचारदाता

काठमाडाैं । ललितपुरको पुल्चोकस्थित श्री लालीगुराँस बहुउद्देश्यीय सहकारी संस्था लिमिटेडले बचतकर्तालाई समयमा नै रकम फिर्ता गर्न नसक्दा बचतकर्ता आक्रोशित हुने क्रम बढेको छ । रकम फिर्ता लिन आएका बचतकर्तालाई सो सहकारीले सिस्टम बिग्रिएको छ भन्दै गेटबाटै फर्काउने गरेको पाइएको छ । सो सहकारीले दसैंअघि नै बचत फिर्ता माग्न पुगेका बचतकर्तालाई छठपछि मात्रै रकम फिर्ता दिने भन्दै आलटाल गरेर फिर्ता पठाएको थियो । छठ सकिएलगत्तै गत सोमबार बचत फिर्ता लिन पुल्चोकस्थित श्री लालीगुराँस सहकारी संस्थाको कार्यालय पुगेका दर्जनौं बचतकर्ताहरू रकम फिर्ता नपाएपछि त्यसै फर्कन विवश भए । जसका कारण सहकारीमा केही समय तनावसमेत भएको बताइएको छ ।