चुनावी धक्कापछि संगठन सुदृढीकरणमा जुट्यो जसपा नेपाल, मैदानमा उत्रिए उपेन्द्र यादव

प्रतिनिधिसभा निर्वाचनमा व्यहोरेको अप्रत्याशित पराजयपछि जनता समाजवादी पार्टी (जसपा) नेपालका अध्यक्ष उपेन्द्र यादव संगठन सुदृढीकरण अभियानमा सक्रिय भएका छन्। चुनावी हारपछि शिथिल बनेको पार्टी संगठनलाई पुनर्जीवित गर्न र कार्यकर्तालाई एकताबद्ध बनाउन उनी स्वयं जिल्ला–जिल्लामा पुग्न थालेका हुन्।

पार्टीको केन्द्रीय समन्वय समितिले सञ्चालन गरेको देशव्यापी अभियानअन्तर्गत यादवले पहिलो चरणमा बर्दिया, बाँके र सुर्खेतमा अगुवा कार्यकर्ता भेला सम्पन्न गरेका छन्। जेठ २५ गते गुलरिया, २६ गते नेपालगञ्ज र २७ गते सुर्खेतमा आयोजित कार्यक्रममा उनले कार्यकर्तालाई चुनावी हारबाट निराश नहुन र नयाँ उत्साहका साथ संगठन निर्माणमा जुट्न आग्रह गरेका थिए।