रिव्दीकोटका एकल पुरुषलाई भत्ता

पाल्पा । रिव्दीकोट गाउँपालिका वडा नं. १ ख्याहाले सरकारीस्तरबाट हालसम्म सुविधा नपाएका एकल पुरुष र महिलालाई जिवन निर्वाह भत्ता दिएको छ । वडा कार्यालयले ८ जना पुरुष र ७ जना महिला गरी १५ जनालाई निर्वाह भत्ता दिएको हो । विवाह नगरी बसेका पुरुष हकमा ४० बर्ष र महिला हकमा ३५ बर्ष पुगेकालाई जनही ५ हजार दरले नगद प्रदान गरेको छ । श्रीमती गुमाएर एकल भएका तर बृद्धभत्ता लिने उमेर नपुगेका एकल पुरुषहरूलाई पनि भत्ता दिइएको वडाध्यक्ष चिरञ्जीवी पोखरेलले बताए ।

स्थानीय तह घरदैलोको सरकार हो भन्ने भावनाको विकास गर्न वडाले बार्षिक कार्यक्रम अनुसार सूचना आव्हान गरी निवेदनको आधारमा भत्ता दिने व्यक्तिहरु छनोट गरेको थियो । यसरी भत्ता पाउनेहरु अधिकांश आर्थिक अवस्था कमजोर भएका र घरपरिवारमा पनि एकलै बसेका व्यक्तिहरु रहेका छन् । वडाले एकल जिवन बिताएका पुरुष र महिलालाई सम्झिएको खुसी लागेको जोगीथुमका केशव कुमालले बताए । उनले पाएको रकमबाट औषधी गर्ने र कुखुरा किनेर पाल्ने बताए ।