जोखिम बढेपछि पुलमा मोटरसाइकल गुडाउनै नमिल्ने संरचना निर्माण

तनहुँको देवघाट गाउँपालिका–५ र चितवनको भरतपुर महानगरपालिका–१ जोड्ने त्रिशूली नदीमाथिको ४४ वर्ष पुरानो झोलुङ्गे पुलमा मोटरसाइकल सञ्चालन स्थायी रूपमा रोक्न संरचनागत अवरोध निर्माण गरिएको छ। पुल अत्यधिक जीर्ण बन्दै गएपछि सम्भावित दुर्घटना रोक्न जिल्ला प्रशासन कार्यालय चितवनले पुलको चितवनतर्फको प्रवेशद्वारमा फलामे ब्यारिकेड जडान गरी मोटरसाइकल गुडाउनै नमिल्ने व्यवस्था गरेको हो।

यसअघि बाँसको अस्थायी अवरोध राखिएको भए पनि त्यसलाई बेवास्ता गर्दै सर्वसाधारणले पुलमा मोटरसाइकल हुइँक्याउन थालेपछि प्रशासनले स्थायी प्रकृतिको फलामे अवरोध निर्माण गरेको जनाएको छ। अब पुलबाट मोटरसाइकलमा यात्रा गर्न मिल्ने छैन। वि.सं. २०३७ मा निर्माण भएको उक्त झोलुङ्गे पुल पैदलयात्रीका लागि मात्र डिजाइन गरिएको पूर्वाधार विकास विभागअन्तर्गतको सस्पेन्सन ब्रिज डिभिजनले जनाएको छ। विभागले लामो समयदेखि मोटरसाइकल सञ्चालन बन्द गर्न ताकेता गर्दै आएको थियो। पुल जीर्ण भइसकेकाले सवारीसाधन सञ्चालन हुँदा कुनै पनि बेला दुर्घटना हुन सक्ने जोखिम रहेको प्राविधिकहरूको निष्कर्ष छ।

यसअघि गत वैशाख ८ गते चितवन प्रशासनले पुलमा मोटरसाइकल सञ्चालनमा रोक लगाएको थियो। स्थानीयवासीको आग्रह र नियम पालना गर्ने प्रतिबद्धतापछि वैशाख १९ गतेदेखि मोटरसाइकल डोहोर्‍याएर मात्र वारपार गर्न पाउने सर्तमा अवरोध हटाइएको थियो। तर, सर्त उल्लङ्घन गर्दै पुनः मोटरसाइकल गुडाउन थालिएपछि प्रशासनले फेरि स्थायी अवरोध निर्माण गरेको हो।

चितवनका प्रमुख जिल्ला अधिकारी गणेश अर्यालले ठिमुराको पुल सञ्चालनमा आइसकेकाले वैकल्पिक मार्ग उपलब्ध रहेको बताउँदै पुलको अस्तित्व जोगाउन तथा सम्भावित दुर्घटना रोक्न मोटरसाइकल सञ्चालनमा स्थायी रोक लगाउनु आवश्यक भएको बताउनुभयो।

देवघाट गाउँपालिकाका प्रवक्ता तथा वडा नम्बर ५ का वडाध्यक्ष पूर्णबहादुर कुँवरले अहिलेको झोलुङ्गे पुललाई पैदलयात्रीका लागि सुरक्षित राख्दै सोही क्षेत्र नजिकै नयाँ मोटरेबल पुल निर्माण गर्नुपर्ने बताउनुभयो। उहाँले झोलुङ्गे पुलको संरक्षण र स्थानीयवासीको आवतजावतलाई सहज बनाउन दीर्घकालीन समाधानका रूपमा पक्की पुल अपरिहार्य भइसकेको उल्लेख गर्नुभयो।

उहाँले गाउँपालिकाको सीमित स्रोतले यस्तो संरचना निर्माण सम्भव नभएकाले सङ्घीय र प्रदेश सरकारले प्राथमिकताका साथ नयाँ पुल निर्माण प्रक्रिया अघि बढाउनुपर्ने आवश्यकता औँल्याउनुभयो। देवघाट क्षेत्रमा माघे सङ्क्रान्ति, बोलबम मेला, बालाचतुर्दशी, औँसी, एकादशी, सूर्यग्रहण र चन्द्रग्रहण लगायत धार्मिक अवसरमा दैनिक दशौँ हजार श्रद्धालुले यही पुल प्रयोग गर्ने गरेका छन्। सामान्य दिनमा पनि पाँच हजारभन्दा बढीले पुलबाट आवतजावत गर्ने गरेका छन्। देवघाट गाउँपालिका–५ का अधिकांश बासिन्दाका लागि भरतपुर पुग्ने सबैभन्दा छोटो मार्ग पनि यही पुल हो।