मध्यपूर्वको युद्धले प्रभावित खेलकुद

फेब्रुअरी २८ मा इजरायल र अमेरिकाले इरानमाथि गरेको संयुक्त सैन्य आक्रमणपछि मध्यपूर्वमा फैलिएको युद्धको ज्वालाले खेलकुदलाई नराम्ररी प्रभावित गरेको छ । क्षेत्रीय अस्थिरता, सुरक्षाको गम्भीर चिन्ता र हवाई क्षेत्रको पूर्ण वा आंशिक निषेधका कारण दर्जनौँ अन्तर्राष्ट्रिय तथा क्षेत्रीय प्रतियोगिताहरू स्थगित, रद्द वा अनिश्चित बन्न पुगेका छन् ।

खेलकुदका विभिन्न विधाका हस्तीहरू युद्धग्रस्त क्षेत्रमा फस्नु र प्रतिष्ठित आयोजनाहरू अन्योलमा पर्नुले खेलकुद जगतमा गहिरो संकट निम्त्याएको छ । विशेषगरी फुटबलको क्षेत्रमा यसको प्रभाव निकै ठूलो देखिएको छ । एसियाली फुटबल महासंघ (एएफसी) ले आफ्नो वार्षिक क्यालेन्डर अन्तर्गतका ‘वेस्ट रिजन’ (पश्चिम क्षेत्र) का सम्पूर्ण खेलहरू तत्कालका लागि स्थगित गरेको छ ।