साढे ३१ लाख रुपैयाँ बराबरको नगदसहित विमानस्थलबाट दुई विदेशी पक्राउ

त्रिभुवन अन्तर्राष्ट्रिय विमानस्थलबाट ३१ लाख ५१ हजार रुपैयाँ बराबरको नगद सहित दुई जना बंगलादेशी नागरिकलाई प्रहरीले नियन्त्रणमा लिएको छ।

बिहीबार दिउँसो १ बजेको उडानबाट काठमाडौंबाट मलेसियाको क्वालालम्पुर जान लागेका दुई जनालाई विमानस्थल सुरक्षा प्रहरी कार्यालयले पक्राउ गरेको एसपी राजकुमार सिलवालले जानकारी दिए।

मोहम्मद इन्ताज अलि र मोहम्मद जाकिर होसैन भन्ने बंगलादेशी नागरिकलाई प्रहरीले पक्राउ गरेको हो।

उनीहरूबाट नेपाली, अमेरिकी र मलेसियन रिंगिट मुद्राको ३१ लाख ५१ हजार रुपैयाँ बराबरको रकम बरामद भएको हो।

उनीहरूलाई ब्यागेज चेकिङ एरियामा हेर्दा सुटकेशभित्र फल्स बटम बनाएर जान लागेको खुलेको हो।

अलि नेपालमा ३८ पटक र होसैन ११ पटक नेपाल आउजाउ गरिसकेका छन्।

उनीहरूमाथि थप अनुसन्धानका लागि राजस्व अनुसन्धान विभाग हरिहर भवनमा बुझाइएको छ।