अहिलेको स्थितिमा विश्वकपमा सहभागी हुन सकिँदैन : इरानी खेलकुद मन्त्री

इरानका खेलकुदमन्त्री अहमद डोन्यामालीले देशको वर्तमान अवस्थामा फिफा विश्वकप २०२६ मा सहभागी हुन सक्ने अवस्था नरहेको बताएका छन् ।

अमेरिका र इजरायलको आक्रमणपछि देशको अवस्था अस्थिर बनेको भन्दै डोन्यामालीले विश्वकप सहभागिता सम्भव नहुने बताएका हुन् ।

अमेरिकी हमलापछि जवाफमा इरानले इजरायल र अमेरिकी सैन्य आधार रहेका देशतर्फ मिसाइल र ड्रोन प्रहार गरेको थियो । यस्तो परिस्थितिमा टोलीलाई विश्वकपमा सहभागी गराउन उपयुक्त नरहेको उनले बताएका छन् ।

‘हाम्रो नेताको हत्या गरिएको अवस्थामा विश्वकपमा सहभागी हुने उपयुक्त परिस्थिति छैन । खेलाडीहरू सुरक्षित छैनन्, त्यसैले सहभागिताको अवस्था छैन,’डोन्यामालीले भने ।

यसैगरी, इरान फुटबल महासंघका अध्यक्ष मेहदी ताजले पनि वर्तमान परिस्थितिमा विश्वकपमा टोली पठाउने विषय कठिन भएको बताएका छन् ।

यसअघि फिफा अध्यक्ष जियानी इन्फान्टिनोले अमेरिकी राष्ट्रपति डोनाल्ड ट्रम्पले इरानलाई प्रतियोगितामा सहभागी हुन स्वागत गरेको बताएका थिए ।

विश्वकप जुन ११ देखि अमेरिका, क्यानडा र मेक्सिकोमा सुरु हुँदैछ । समूह ‘जी’ मा इरान इजिप्ट, बेल्जियम र न्युजिल्यान्डसँग छन् । इरानले १५ जुनमा न्युजिल्यान्ड र २१ जुनमा बेल्जियमविरुद्ध लस एन्जलस तथा २६ जुनमा सियाटलमा इजिप्टविरुद्ध खेल्नेछ ।

प्रकाशित मिति: बिहीबार, फागुन २८, २०८२

११:१९