जनता तर्साउने खेल बन्द गर

विचार तथा अभिव्यक्ति स्वतन्त्रता नागरिकको मौलिक अधिकार हो । संविधानको धारा २७ ले पनि यसलाई प्रत्याभूत गरेको छ । तर यसको प्रतिरक्षाको लागि खटिनुपर्ने जिम्मेवार पक्षहरु यस हकका विरुद्ध उत्रिन्छन् भने त्यसले संवैधानिक प्रावधानलाई कमजोर तुल्याउनेछ ।

लोकतन्त्रमा कसैको विचार तथा अभिव्यक्तिप्रति असहमति प्रकट गर्न पाइन्छ तर आफूलाई मन नपर्ने विचार बोल्नै नपाउने वा बोल्नै दिन्न भन्न पाइन्न । कसैले त्यस्तो भन्छ भने त्यसलाई लोकतान्त्रान्त्रिक मूल्य र मान्यताको बर्खिलाप मानिन्छ । मेडिकल व्यवसायी दुर्गा प्रसाईंले शासन व्यवस्थामा देखिएका बेथिति र संविधानकै प्रावधान विपरीत अभिव्यक्ति दिँदै बिहीबार गरेको प्रदर्शनका विरुद्ध नेकपा (एमाले) को भ्रातृ संगठन युवा संघ नेपालले गरेको प्रदर्शनलाई यही दृष्टिले हेर्नु उपयुक्त हुनेछ ।