४१ करोड रुपैयाँ मूल्य बराबरको सरकारी खोप खेर

काठमाडौँ । राष्ट्रिय खोप कार्यक्रम अन्तर्गत सरकारले उपलब्ध गराउँदै आएका खोप प्रत्येक वर्ष खेर जाने गरेको पाइएको छ । खोपको आवश्यकता निर्धारण र उपयोग व्यवस्थापन प्रभावकारी नभएका कारण खोप खेर गएको देखिएको हो ।

नेपालमा स्वीकृत मापदण्डअनुसार भण्डारण र उपयोग हुन नसक्दा ४१ करोड ४ लाख ८२ हजार रुपैयाँ मूल्य बराबरको सरकारी खोप खेर गएको छ । स्वास्थ्य सेवा विभागले उपलब्ध गराएको विवरण अनुसार १० प्रकारका खोपको खेर जाने दर परीक्षण गर्दा ५४ लाख ६८ हजार २९५ जनालाई खोप लगाउँदा ४१ करोड ४ लाख ८२ हजार रुपैयाँ मूल्य बराबरको सरकारी खोप खेर गएको हो । सोमध्ये बी.सी.जी.खोप ८२ प्रतिशत तथा अन्य खोपहरू औसतमा ३६ प्रतिशत खेर गएको देखिन्छ । स्वीकृत मापदण्ड अनुसार खोपको उपयोग गरी खेरजाने दरमा न्यूनीकरण गर्नुपर्ने महालेखा परीक्षकको ६३औँ प्रतिवेदनले औँल्याएको हो ।