‘संकटकाल लगाएर जान्छु भन्ने हो कि ? सदन विघटन गर्ने कुरा हो ?’

नेपाल कम्युनिस्ट पार्टी (नेकपा)का कार्यकारी अध्यक्ष पुष्पकमल दाहाल प्रचण्डले पार्टी अध्यक्ष वा प्रधानमन्त्रीबाट हटाउन खोजे कुर्सी भाँचिदिने चर्चा आइरहने भन्दै अर्का अध्यक्ष केपी ओलीसँग प्रश्न गरेका छन् । विघटन भइसकेको पार्टीको महाधिवेशनले छानेको अध्यक्ष हुनाले आफूलाई कसैले हटाउन नसक्ने तर्क ओलीले गर्ने गरेको प्रचण्डले टिप्पणी गरेका छन् ।

शुक्रवार बसेको पार्टी सचिवालय बैठकमा अर्का अध्यक्ष एवं केपी शर्मा ओलीलाई बुझाएको ७ पेज लामो पत्रमा प्रचण्डले पार्टी एकता गर्ने र यसको रक्षा गर्ने काममा आफ्नो बढी योगदान रहेको जिकिर गरेका हुन् । ‘पार्टी अध्यक्ष वा प्रधानमन्त्रीबाट हटाउन खोजे कुर्सी भाँचिदिने चर्चा पनि आइरहन्छ, यो के हो कमरेड ? यो फेरि अर्को अध्यादेश ल्याएर पार्टी फुटाउने कुरा हो कि ? संकटकाल लगाएर जान्छु भन्ने हो कि ? सदन विघटन गर्ने कुरा हो कि ? मैले बुझेको छैन’ प्रचण्डले पत्रमा भनेका छन् ।