राष्ट्रिय वाणिज्य बैंककाे अनलाइन प्रणालीमार्फत धितो बन्धक रोक्का तथा फुकुवा सेवा सञ्चालन

काठमाडौँ / राष्ट्रिय वाणिज्य बैंक लिमिटेडले अनलाइन प्रणालीमार्फत धितो बन्धक रोक्का तथा फुकुवा सेवा औपचारिक रूपमा सञ्चालनमा ल्याएको छ।

नेपाल सरकारको शासकीय सुधार कार्यसूचीअनुसार नतिजामा आधारित शासकीय प्रबन्ध लागु गर्ने उद्देश्यसहित बैंकले सेवा प्रक्रियालाई फेसलेस, समयबद्ध र डिजिटल प्रणालीमा रूपान्तरण गरेको हो।

यस प्रणालीमार्फत धितो जग्गाको रोक्का तथा फुकुवा प्रक्रिया अब अनलाइनमै सम्पन्न गर्न सकिनेछ। हालसम्म बैंकले सोही प्रणालीमार्फत ८०० भन्दा बढी धितो बन्धक रोक्का/फुकुवा सम्पन्न गरिसकेको जनाएको छ।

यसअघि यस सेवाका लागि डिपार्टमेन्ट अफ ल्यान्ड म्यानेजमेन्ट एण्ड अर्काइभ र राष्ट्रिय वाणिज्य बैंकबीच समझदारी भएको थियो।

बैंककाअनुसार अनलाइन प्रणाली लागू भएपछि सेवा प्रक्रिया छिटो, पारदर्शी र सहज हुनुका साथै समय तथा खर्चमा बचत हुने अपेक्षा गरिएको छ। यसले ग्राहक सन्तुष्टि बढाउने विश्वास पनि लिइएको छ।

वि.सं. २०२२ सालमा स्थापना भएको पूर्ण सरकारी स्वामित्वको यो बैंकले हाल देशभर ३१५ शाखामार्फत कर्जा, निक्षेप, एटिएम, मोबाइल बैंकिङलगायत आधुनिक डिजिटल बैंकिङ सेवा प्रदान गर्दै आएको छ।

सम्बन्धित विषय:

# राष्ट्रिय वाणिज्य बैंक

# अनलाइन