कोरला नाका जोड्ने (कोवाङ–जोमसोम) सडक फेरि अलपत्र,यात्रुलाई सास्ती

मुस्ताङ। उत्तर–दक्षिण जोड्ने राष्ट्रिय गौरवको बेनी–जोमसोम–कोरला सडकअन्तर्गत मुस्ताङको थासाङ गाउँपालिका–२ कोवाङदेखि घरपझोङ–४ जोमसोम जोड्ने १७ किलोमिटर कालोपत्र सडक स्तरोन्नति कार्य पुनः अलपत्र परेको छ ।

कालीगण्डकी करिडोर (बेनी–जोमसोम–कोरला) सडक आयोजनाअन्तर्गत सुरु गरिएको बेनी–जोमसोम ७४ किलोमिटर सडकको चौथो खण्ड निर्माण कम्पनीको पटकपटकको ढिलासुस्ती र बेवास्ताका कारण स्तरोन्नति काम अलपत्र पर्दै आएको हो ।

बेनी–जोमसोम सडकअन्तर्गत दोस्रो र तेस्रो खण्ड निर्माण सम्पन्न भइसकेर आयोजनालाई हस्तान्तरण भइसकेको छ । तर कोरलानाका जोड्ने कोवाङ–जोमसोम सडकको ८५ प्रतिशत भौतिक प्रगति भइसके पनि निर्माण कम्पनीले काम पूरा नगरेको आयोजनाले जनाएको छ ।

त्रिदेशीय व्यापारिक मार्गका रूपमा विस्तार गर्ने उद्देश्यले तत्कालीन सरकारले नेपाल–चीन कोरलानाका जोड्ने बेनी–जोमसोम–कोरला सडक आव २०७३/७४ देखि सुरु गरेको थियो । सोहीअनुसार कोवाङ–जोमसोम १७ किलोमिटर चौथो खण्ड रु ७० करोड लागतमा ठेक्का सम्झौतामार्फत निर्माण सुरु गरिएको थियो ।

कोवाङ–जोमसोम अस्फाल्ट कालोपत्र सडक स्तरोन्नतिका लागि पप्पु गौरी पार्वती, कोशी एन्ड न्यौपाने जेभीले ठेक्का सम्झौता गरेका थिए । नालीसहित ११ मिटर चौडा सडकमा कालोपत्र गर्ने योजना भए पनि ठेक्का सम्झौता भएको आठ वर्ष बितिसक्दा पनि निर्माण कार्य सम्पन्न हुन सकेको छैन ।

सुरुआती चरणमा जेभीको जोइन पार्टनर कोशी एन्ड न्यौपानेले निर्माणको जिम्मा लिएको थियो । तर कामले गति लिन नसकेपछि मुख्य पार्टनर पप्पु गौरी पार्वतीले निर्माण कार्य अघि बढाउने प्रयास गरेको थियो ।

कोवाङ–जोमसोम सडक स्तरोन्नतिअन्तर्गत खन्ती–टुकुचेस्थित थापाखोलासम्म, टुकुचे सिरान टोलीदेखि मार्फासम्म सडक स्तरोन्नति तथा कालोपत्र कार्य सम्पन्न भएको आयोजनाले जनाएको छ । त्यस्तै मुस्ताङको स्याङगाउँ पुछारदेखि पुथाङ एयरपोर्टसम्म कालोपत्र तथा पिसीसी ढलानसहितको काम सकिएको छ ।

जोमसोम प्रादेशिक अस्पतालदेखि जोमसोम पक्की पुलसम्म करिब १५ किलोमिटर सडक कालोपत्र विस्तार कार्य सम्पन्न भइसकेको आयोजना प्रमुख तेजस्वी शर्माले बताएका छन् । उनका अनुसार थासाङको टुकुचे गाउँभित्रको सडक, मार्फा पुलदेखि स्याङ पुछारसम्म र जोमसोम बजारस्थित नेपाली सेनाको ब्यारेक अगाडिको सडक गरी करिब दुई किलोमिटर सडक निर्माणाधीन अवस्थामा रहेको भए पनि काम अघि बढ्न सकेको छैन ।

निर्माणाधीन सडकअन्तर्गत जोमसोमस्थित नेपाली सेनाको ब्यारेक अगाडि कालोपत्रका लागि फिलिङ गर्न माटो थुपारिएकाले सवारी आवागमनमा समस्या भइरहेको छ । कालोपत्र ढिलाइ हुँदा त्यहाँस्थित सेनालाई धुवाँधुलोले पनि असर परेको छ ।

यसअघि कोरलानाका जोड्ने कोवाङ–जोमसोम सडक निर्माण वैशाखभित्र सम्पन्न गर्न स्थानीय प्रशासनले निर्माण कम्पनीलाई निर्देशन दिएको थियो । तर उक्त निर्देशनलाई बेवास्ता गर्दै निर्माण कम्पनीले सडक निर्माणको काम अघि बढाएको छैन ।

कोवाङ–जोमसोम सडक निर्माणमा गत कात्तिकदेखि कुल ठेक्का सम्झौताको ०.०५ प्रतिशत दैनिक हर्जाना लाग्नेगरी जरिवाना तोकिएको आयोजना प्रमुख शर्माले बताएका छन् । यस खण्डको सातौँपटक म्याद थप भइसकेको र जरिवाना अवधि २०० दिन रहने उल्लेख गरिएको छ ।

चैत महिनासम्म अन्तिम समयसीमा रहेको र सो अवधिसम्म जरिवाना बुझाएर अधुरो काम सुरु गर्नुपर्ने बताइएको छ । त्यसो नभए निर्माण कम्पनीसँगको ठेक्का सम्झौता भङ्ग गरी नयाँ ठेक्का प्रक्रिया सुरु गरिने जनाइएको छ ।

निर्माण कम्पनीको ढिलासुस्तीका कारण अलपत्र परेको कोवाङ–जोमसोम सडक छिटो सम्पन्न गर्न आयोजनाले ठेक्का सम्झौता तोडेर नयाँ ठेक्का खुलाउन विभागसँग सहमति माग गरेको भए पनि हालसम्म स्वीकृति प्राप्त भएको छैन ।

सार्वजनिक खरिद ऐन संशोधन नभए निर्माण कम्पनीले ठेक्का सम्झौता लागतको १० प्रतिशत जरिवाना तिर्नुपर्ने व्यवस्था रहेको आयोजनाले जनाएको छ । हाल सडक निर्माणमा प्रयोग भएका उपकरण थन्क्याइएका छन् र निर्माण कार्यमा खटिएका जनशक्ति पनि काममा फर्किएका छैनन् ।