सोमबारदेखि राहदानीका लागि दैनिक एक हजार ‘अपोइन्टमेन्ट स्लट खुल्ने

काठमाडौँ । राहदानी विभागले राहदानी वितरणमा देखिएको समस्या समाधानका लागि दैनिक एक हजार जनासम्मका लागि अपोइन्टमेन्ट स्लट खोल्ने निर्णय गरेको छ। विभागका अनुसार अर्को व्यवस्था नभएसम्म कार्तिक १७ गतेदेखि हरेक दिन साँझ ५ बजे (सार्वजनिक बिदाको अघिल्लो दिन बाहेक) नयाँ स्लट खुल्ने व्यवस्था गरिएको छ।

विभागले हाल विद्युतीय राहदानी आपूर्तिका लागि नयाँ आपूर्तिकर्तासँग सम्झौता गरी नयाँ प्रणाली निर्माण कार्य अघि बढाइरहेको जनाएको छ। हालको आपूर्तिकर्ता र नयाँ आपूर्तिकर्ताबिचको हस्तान्तरण (ह्याण्डओभर–टेकओभर) प्रक्रियाका कारण राहदानी वितरणमा केही समस्या उत्पन्न भएको विभागले जनाएको छ।