पार्टी सञ्चालन शैलीप्रति झलनाथ असन्तुष्ट, प्रचण्डलाई बुझाए ध्यानाकर्षण पत्र

काठमाडौँ । नेपाली कम्युनिस्ट आन्दोलनको वर्तमान अवस्था र पार्टी सञ्चालन शैलीप्रति गम्भीर असहमति जनाउँदै वरिष्ठ नेता झलनाथ खनालले संयोजक पुष्पकमल दाहाल ‘प्रचण्ड’लाई २४ पृष्ठ लामो सुझाव तथा ध्यानाकर्षण पत्र बुझाएका छन्।

खनालले पार्टीभित्र देखिएका वैचारिक तथा सङ्गठनात्मक कमजोरी, कार्यकर्ता व्यवस्थापन र नेतृत्वको कार्यशैलीबारे प्रश्न उठाउँदै एकीकृत समाजवादी र माओवादी केन्द्रबिच एकता भएको सात महिना बितिसक्दा पनि तल्लो तहसम्म एकीकरण हुन नसकेको उल्लेख गरेका छन्। स्थानीय तहदेखि जिल्ला र प्रदेश तहसम्म सङ्गठनात्मक समायोजन अपूर्ण रहेको तथा कार्यकर्ताबिच अन्योल कायम रहेको उनको भनाइ छ।