डिजिटल पूर्वाधार बढ्यो, उत्पादनशील प्रयोग बढेन

काठमाडौं । संयुक्त राष्ट्रसंघअन्तर्गत दूरसञ्चार क्षेत्रको छाता संस्था अन्तर्राष्ट्रिय दूरसञ्चार संघ (आईटीयू) ले सार्वजनिक गरेको ‘आईसीटी विकास सूचकांक २०२६’ मा नेपालले ६८.१ अंक प्राप्त गरेको छ। तीन वर्षसम्म तथ्यांक अभावका कारण सूचकांकमा नसमेटिएको नेपाल यस पटक पुनरागमन गर्दै विश्व मानचित्रमा देखिएको हो। सन् २०२३ यता नेपालले समयमै र पूर्ण तथ्यांक पठाउन नसक्दा सूचकांकमा अटाएको थिएन।

कुल १० मध्ये कम्तीमा ५ वटा आधिकारिक सूचक उपलब्ध गराएपछि नेपाल यस वर्ष सूचीकृत भएको छ। तथापि निम्न–मध्यम आय भएका देशको समूहमा रहेको नेपालको डिजिटल विकासमा भइरहेको पूर्वाधार विस्तार र यसको वास्तविक प्रयोगबीच खाडल देखिएको छ। सूचकांकका दुई स्तम्भ ‘मिनिङफुल कनेक्टिभिटी’ मा नेपालको अंक ८३.७ र ‘युनिभर्सल कनेक्टिभिटी’ मा ५२.५ छ। कुल ३१.२ को यस अन्तरले नेपालमा इन्टरनेटको पूर्वाधार र नेटवर्कको पहुँच बढेको पनि त्यसको वास्तविक प्रयोग र अवलम्बन सुस्त रहेको देखाउँछ।