सरुवापछि कर्मचारीको शाही बिदाइ

जनकपुरधाम । ‘कहीँ नभएको जात्रा हाँडी गाउँमा’ यो उखानजस्तै मधेस प्रदेशमा अन्यत्र नभएका काम कुरा भइरहेको छ । एक जना हाकिमको बिदाइ ‘शाही’ शैलीमा भएपछि अहिले प्रदेशभरि चर्चाको विषय बनेको छ । सरुवा हुनु समान्य प्रक्रिया हो तर त्यसलाई उत्सवजस्तो बनाएपछि त्यो असामान्य घटना बन्यो ।

उद्योग, पर्यटन तथा वन मन्त्रालय, मधेस प्रदेशका प्रदेश सचिव विशाल घिमिरेको दुई साताअघि गण्डकी प्रदेशको उद्योग, पर्यटन, वन तथा वातावरण मन्त्रालयमा सरुवा भयो । उनको बिदाइ यति भव्य गरियो । जिल्लाको आठवटै डिभिजन वन कार्यालयका साथै इलाका वन कार्यालयका कर्मचारी विदाइ समारोहमा सहभागी भए । वन क्षेत्रमा काम गर्ने केही व्यक्तिले नागरिक समाजको नाउँमा सम्मानसमेत गरे । मन्त्रालयका एकजना कर्मचारीका अनुसार सचिवलाई १४ ठाउँमा बिदाइ एवं सम्मान गरिएको छ ।