हामी पैदलसम्वाद पनि गरिरहेका छौँ : मुख्यमन्त्री कार्की

विराटनगर । कोशी प्रदेशका मुख्यमन्त्री केदार कार्कीसहितको टोलीले हात्ती प्रभावित क्षेत्रमा सुरु गरेको पदयात्राले चार दिन पार गरेको छ । मुख्यमन्त्री कार्की, पर्यटन, वन तथा वातावरण मन्त्री गणेशप्रसाद उप्रेती, सचिव विशाल घिमिरेसहितको टोलीले शनिबार मोरङको लेटाङबाट सुरु गरेको पदयात्रा सुनसरीको इटहरीस्थित तालतलैमा पुगेर बास बसेको छ । शनिबारको यात्राका क्रममा मोरङको केराबारी ९ देवीझोडामा भेटिएका कार्की केही अस्वस्थ र शिथिल देखिए । तर, हिँड्न भने उनले छोडेका छैनन् ।

हात्तीका गौँडा गौँडा चाहर्दै हात्ती पीडित जनतासँग संवाद पनि गरेका कार्कीले दुवै खुट्टामा पट्टि बाँधेका थिए । हिँड्दा खुट्टा खोच्याएको प्रस्ट देखिन्थ्यो । उनको तुलनामा पर्यटन मन्त्री उप्रेती केही स्वस्थ देखिए । सचिव घिमिरे भने पैदल यात्रा निरन्तर गर्न नसक्ने भएपछि आकलझुकल हिँडेर गाडीमै हिँडिरहेका छन् । झापाको बाहुनडाँगीबाट सुरु भएको पदयात्राले २४३ किलोमिटरको दुरी पार गर्दै उदयपुरको कटारीस्थित बेलसोत बजारमा फागुन १६ गते पुग्नुपर्नेछ । पदयात्राले तय गरेको उक्त क्षेत्र हात्तीको बाटो मानिन्छ । उनै मुख्यमन्त्री कार्कीसँग पदयात्राका क्रममा भेटिएका र देखिएका समस्याबारेमा कुराकानी गरेका छौँ । प्रस्तुत छ कार्कीसँग गरिएको कुराकानीको सम्पादित अंश ।