स्थानीय तह दलीय कि गैरदलीय ?

आगामी वैशाखमा स्थानीय तहको आवधिक निर्वाचन हुँदै छ। उक्त निर्वाचन नजिकिँदै गर्दा गैरदलीय वा स्वतन्त्र उम्मेदवार हुनुपर्ने विषयमा देशैभरि बहस चल्न थालेको छ। सुनसरीका राजनीतिक दलका नेता, सर्वसाधारण, विद्यार्थी र युवापुस्तामध्ये धेरैजसोले योग्य व्यक्तिलाई नेतृत्वमा पुर्याउन र बिनापक्षपात विकास गर्न गैरदलीय उम्मेदवार हुनुपर्ने धारणा राखेका छन्। केहीले भने संविधानले बहुदलीय लोकतान्त्रिक शासन व्यवस्था अवलम्बन गरेकाले त्यसो गर्नु उपयुक्त नहुने तर्क राखेका छन्।

स्थानीय तहमा खासगरी ससाना काममा पनि दलबाट विजयी जनप्रतिनिधिसँग काम लिन दलकै सिफारिस चाहिने हुँदा पनि सर्वसाधारण नागरिकको आत्मसम्मान गिरेकाले समस्या हुने गरेको सुनसरीको कोसी गाउँपालिकाका पवनकुमार रौनियारले बताए। ‘सानो काम पर्दा पनि दलकै दैलो कुर्नुपर्ने अवस्थाले गर्दा स्थानीय सरकार गैरराजनीतिक भएकै राम्रो हुन्छ किनकि जनताले सही व्यक्तिको पहिचान गर्छन्।’ उनले दलगत उम्मेदवारीले योग्यताको भन्दा पनि पार्टीको प्रभावलाई प्राथमिकता दिएको दाबी गर्छन्। ‘अहिले दलको संगठन सक्रिय भएकाले दलका उम्मेदवार राम्रो–नराम्रो जस्तो भए पनि उसैलाई मत दिने गरिएको छ,’ उनी भन्छन्।