प्रविधि प्रयोगमार्फत् अन्तरनिर्वाचन क्षेत्र मतदान

काठमाडौं । सरकारले प्रविधिको प्रयोगमार्फत अन्तरनिर्वाचन क्षेत्र मतदान सम्भव हुने व्यवस्था गर्ने भएको छ । भिन्न निर्वाचन क्षेत्रमा बसोबास गरिरहेका नागरिकले बसोबास गरिरहेको वा सेवारत निर्वाचन क्षेत्रबाटै मतदान गर्ने व्यवस्थाका लागि कानुन संशोधनको तयारी गरेको हो । निर्वाचन आयोगले विज्ञहरूसँग सल्लाह लिएर कानुनी तथा प्राविधिक तयारीसहित मतदान व्यवस्थापनको सहजीकरण गर्ने तयारी गरिरहेको आयोगका प्रवक्ता नारायणप्रसाद भट्टराईले जानकारी दिए ।

विदेशमा बसोबास गरिरहेका नागरिकले समेत मताधिकार पाउनुपर्छ भन्दै आन्दोलन तथा पैरवी भइरहेका बेलामा अन्तरनिर्वाचन क्षेत्र मताधिकार व्यवस्था सहजीकरण पनि एक हिसाबले प्रोग्रेसिभ कदम हुने भएकाले तयारी गरिएको आयोग स्रोतले जानकारी दिएको छ । निर्वाचन क्षेत्रभन्दा बाहिर अर्थात् अन्तरनिर्वाचन क्षेत्रमा बसोबास वा सेवारत मतदाताका लागि आफ्नो सम्बन्धित क्षेत्रमा जान नसक्ने अवस्था जनाई अस्थायी मतदातासूचीमा सूचीकृत गरी मतदानमा सहभागी गराउन लागिएको आयोगले जनाएको छ ।