किन भासिँदै छ जोशीमठ?

भारतको उत्तराखण्डस्थित जोशीमठमा अव्यवस्थित निर्माण कार्य, व्यापक सडक विस्तार तथा जलविद्युत् परियोजनाहरू तीव्ररुपमा निर्माण गरिँदा शहरमुनिबाटै जमिन भासिइरहेको छ।

प्राचीनकालदेखि तीर्थस्थलको रुपमा रहँदै आएको जोशीमठ शहरका बासिन्दाहरू यो पुसको कठ्याङ्ग्रिँदो जाडोमा आफ्नो घर छाडेर भाग्नुपर्‍यो। दुई हजार पाँच सय भवनहरू रहेको शहरको एक चौथाइ जमिन धस्सिने र जग ढल्किन थालेपछि घरका भित्तामा ठूला-ठूला धाँजा फाटे। केन्द्रीय तथा उत्तराखण्ड राज्य सरकारले त्यहाँका हजारौँ बासिन्दालाई तत्काल होटलमा सार्‍यो भने सडक विस्तार तथा जलविद्युत् परियोजनाका सम्पूर्ण काम रोक्यो।