चुनावमा ‘शत्रुतापूर्ण’ प्रतिस्पर्धा

नेपालको संविधान २०७२ को प्रस्तावनामा मुलुकले ‘जनताको प्रतिस्पर्धात्मक बहुदलीय लोकतान्त्रिक शासन प्रणाली’ अँगाल्ने कुरा उल्लेख छ । यस्तो व्यवस्थामा आवधिक निर्वाचनको महत्वपूर्ण भूमिका हुन्छ । बहुदलीय व्यवस्था अँगालेका हरेक मुलुकमा आवधिक निर्वाचनका माध्यमबाट सरकारको नेतृत्व चयन हुने गर्दछ । जनतामा लोकप्रिय भएको दल दोहोरिन्छ, नत्र हट्छ । दुई वर्षअघि भएको अमेरिकी राष्ट्रपति चुनावले दिएको सन्देश पनि यही थियो ।

हाम्रो देशमा २०४६ देखि बहुदलीय राज्य व्यवस्था भए तापनि २०६२ देखि संघीय गणतन्त्रात्मक राज्य व्यवस्था छ । यो व्यवस्था सामान्य बहुदलीय व्यवस्था वा संसदीय व्यवस्थाभन्दा उन्नत मानिन्छ । तर, व्यवस्था जतिसुकै उन्नत भए पनि त्यसलाई सञ्चालन गर्ने राजनीतिक दलको उदात्त भावना, अग्रगामी सोच र स्वस्थ प्रतिस्पर्धा हुन सकेन भने कामयावी हुँदैन । त्यस्तो देशमा व्यवस्था, जनता र राज्यका अरू संयन्त्रले पनि दुःख पाउँछन् ।