सम्साँझै सुत्छ राजधानी

देशको राजधानी सहर काठमाडौंमा राति ८ बजेपछि सार्वजनिक सवारीसाधन पाइँदैन, सरकारी पेट्रोल पम्प खुला हुँदैनन् । १० बजेपछि अधिकांश रेस्टुरेन्ट बन्द हुन्छन् । व्यावसायिक सुरक्षा दिनुपर्ने प्रहरी प्रशासन नै पसल, रेस्टुरेन्ट बन्द गराउँदै हिँड्छ ।

बाध्यता १ : बाहिर ग्राहकको भिड बढिरहेको हुन्छ, तर काठमाडौं महाबौद्धस्थित मोबाइल हाउसमा व्यवसाय गर्दै आएका अनिल राईलाई साँझ ७ बज्नेबित्तिकै सटर तान्न हतारो हुन्छ । मोरङ पथरीका राईलाई अझै बढी व्यापार गरौँ भन्ने रहर नभएको होइन, तर ८ बजेसम्म पसल बन्द गर्नुपर्ने नियम र सार्वजनिक बस पनि नपाइने चिन्ताले चाँडै पसल बन्द गर्छन् । कलंकी बस्ने उनी साढे ७ बजेसम्म बस बिसौनी पुगेनन् भने काठमाडौं मल–रत्नपार्क आसपासबाट उनको रुटको बस छुटिसक्छ । त्यसपछि महँगो शुल्क तिरेर पठाओ बाइक या ट्याक्सी चढ्नुपर्छ ।