उद्धारसँगै आत्मबल बढाऊ

इजरायलमा जारी द्वन्द्वमा फसेका नेपाली नागरिकको जीवनरक्षाका लागि यति बेला सर्वत्र चासो र चिन्ताको विषय बनेको छ । गत शनिबार प्यालेस्टाइन विद्रोही हमासद्वारा भएको आक्रमणमा परी १० नेपाली विद्यार्थीको मृत्यु र कैयौँ घाइते भएको दुःखद घटना सार्वजनिक भएलगत्तै इजरायलमा भएका नेपालीहरुको जीवनरक्षाका लागि आम चासो बढ्नु स्वाभाविक हो । सो घटनामा परी दिवंगत हुनेका परिवार, घाइते र बंकरमा रहेका अलपत्र नेपालीहरुको चित्कार सरकारले सुनिरहेको र उद्धारका लागि प्रधानमन्त्रीसहितको सरकारी टोलीले पहल गरिरहेको बताइएको छ । विश्वका अन्य द्वन्द्वग्रस्त क्षेत्रमध्ये तुलनात्मकरुपमा सुरक्षित क्षेत्र मानिएको इजरायलमा यति ठूलो मात्रामा नेपालीको मानवीय क्षति भएको सम्भवतः यो पहिलो घटना हो ।

५० वर्षअघि योम किपर युद्ध शुरु भएको (६ अक्टोबरको) भोलिपल्ट शनिबार प्यालेस्टाइनको विद्रोही सेना हमासले इजरायलमाथि गरेको आक्रमणमा १० नेपालीसहित ६ सयभन्दा बढी मारिएको घटनाले यतिखेर विश्वमै तहल्का मच्चाएको छ । प्यालेस्टाइनी कट्टरपन्थी समूह हमासले इजरायलमा गरेको आक्रमणमा तीनजना नेपालीसहित सयौंको संख्यामा घाइते भएका छन् । विश्व समुदायबाट हेर्दा इजरायलको द्वन्द्वग्रस्त क्षेत्रमा नेपाली नागरिकहरु छिटपुटरुपमा प्रभावित भएको देखिए पनि नेपालका लागि यसलाई निकै दुःखदायी र अविस्मरणीय घटनाका रुपमा लिन सकिन्छ । सिंगो विश्वलाई नै हलचल दिने गरी भएको यो घटनापछि नेपाली नागरिकको जीउधनको सुरक्षाको आवाज आम जनसमुदायसम्म पुगेको अवस्था छ ।