आधिकारिक थोक विक्रेताबाहेक अन्यबाट औषधि खरिद–बिक्री नगर्न आग्रह

काठमाडौँ । नेपाल औषधि व्यवसायी संघ काठमाडौँले आधिकारिक थोक विक्रेता बाहेक अन्य कुनैपनि व्यक्ति वा माध्यमबाट आएका औषधिहरू खरिद तथा बिक्री नगर्न खुद्रा औषधि व्यवसायीलाई अनुरोध गरेको छ । औषधि गुणस्तर, सुरक्षित आपूर्ति प्रणाली, सेवाग्राहीको स्वास्थ्य सुरक्षालाई मध्येनजर गर्दै संघले आधिकारिक थोक विक्रेताबाट मात्रै औषधि खरिद तथा विक्री गर्न अनुरोध गरेको हो ।

संघले बिहीबार व्यावसायिक सूचना जारी गर्दै स्रोत पुष्टि नभएका वा अनधिकृत माध्यमबाट आएका औषधिहरू खरिद, बिक्री र वितरण नगर्न आग्रह गरेको छ । कुनैपनि औषधि आधिकारिक उत्पादक, आधिकारिक आयातकर्ता वा उनीहरूले नियुक्त गरेका आधिकारिक थोक विक्रेता मात्र खरिद गर्न आह्वान गरेको छ । संघका महासचिव शुभमान श्रेष्ठले स्रोत पुष्टि नगरी औषधि खरिद वा बिक्री गर्नु जनस्वास्थ्य र व्यवसाय दुवैका लागि गम्भीर जोखिमको विषय रहेको बताए ।