एमालेको संरचना र कार्यशैली रिसेट गर्नुपर्ने बेला आयो, जनमतलाई षड्यन्त्र भन्नु आत्मघाती: सुरेन्द्र पाण्डे

काठमाडौँ । नेकपा (एमाले) का नेता सुरेन्द्र पाण्डेले पार्टीको वर्तमान सञ्चालन पद्धति र कार्यशैलीलाई जनताले पूर्ण रूपमा अस्वीकार गरेको टिप्पणी गरेका छन् । निर्वाचनमा प्राप्त परिणामलाई षड्यन्त्र वा अन्तर्घातको नाम दिएर नेतृत्व उम्किन नमिल्ने भन्दै उनले पार्टीको समग्र संरचना नै रिसेट गर्नुपर्ने आवश्यकता औँल्याएका हुन् ।

सामाजिक सञ्जालमा आफ्नो धारणा राख्दै नेता पाण्डेले जनताले मतपत्रमार्फत अस्वीकार को कठोर फैसला सुनाइसकेको अवस्थामा सत्य बोल्ने कार्यकर्तालाई कारबाहीको धम्की दिनु अविवेकी कार्य हुने बताएका छन् । उनले भने, ‘यति ठुलो नैतिक पराजयपछि पनि अरूलाई कारबाही गर्ने नैतिक आधार अब नेतृत्वसँग कति बाँकी छ?’