भेनेजुएला भुकम्प : एक व्यक्तिको आठ दिनपछि भग्नावशेषबाट जीवितै उद्धार

भेनेजुएला : भेनेजुएलामा आएको विनाशकारी दुई भूकम्पको आठ दिनपछि नौतले भवनको भग्नावशेषबाट एक व्यक्तिलाई जीवितै उद्धार गरिएको छ । उद्धार टोलीले यसलाई ‘चमत्कारिक उद्धार’ को संज्ञा दिएको छ । हेर्नान अल्बेर्तो गिल फ्लोरेस नामका ती व्यक्ति ला ग्वाइरास्थित एउटा सपिङ मलको पार्किङ भवन भत्किँदा करिब २९ फिट गहिरो भग्नावशेष मुनि पुरिएका थिए ।

स्थानीय तथा अन्तर्राष्ट्रिय उद्धार टोलीले धेरै दिनसम्म अत्यन्तै सावधानीपूर्वक सञ्चालन गरेको अभियानपछि बिहीबार उनलाई सुरक्षित रूपमा बाहिर निकालिएको हो । ४० वर्ष हाराहारीका गिल उक्त सपिङ मलमा सुरक्षागार्डका रूपमा कार्यरत थिए । चिलीको अग्निनियन्त्रण विभागका अनुसार उनी उद्धारपछि राम्रो स्वास्थ्य अवस्थामा छन् र उपचारका लागि अस्पताल लगिएको छ ।